拉雜

瑣碎事 2 樂 　　 無無聊聊，東拉西扯揾野講！ 細g聽歌學日文，對電視既字幕照抄，似乎似模似樣！ 二孫女鋼琴考試得到好成績，女兒話見佢完全唔緊張，又唔肯練習，以為佢唔合格，誰知有如此好成績！ 佢參加果隊管弦樂得到優異獎，上個月去華盛頓表演與比賽，第一次單獨離家。婆婆少不免津貼佢既洗費啦！咁叻女要獎勵下架！今次既旅費很貴，因為坐飛機來回。美國很好，家長無錢，學校舉行義賣會，籌錢幫家長，津貼一半旅費，孫兒才能成行！女兒話無錢，所以出力幫手義賣。 講完孫兒，輪到我威啦！檯上兜銀仔是今年的累積戰果！手上的紅衫魚是四女婿進貢！我地玩得很細，很少紙幣架！女婿想偷雞，我話事只是5元，所有人已經投降，我起啤架，女婿無牌在手，竟然大四十元！諗住大走我，佢就可以偷雞成功！我對佢講，你呢招唔得架，你太不了解外母我啦！我肯定你無牌，結果我手上有紅衫魚！佢呢次是第三次偷唔到雞！敗在我手！ 係咪很有賭神風采呢！

驚險之旅

今個旅程真的驚險重重，今日還能在此與大家見面吹水，十分萬幸，非常感恩！可以講是執番條命！是否講得誇張？並無誇張，且待我慢慢道來！ 心臟檢查顯示我有兩條血管鈣化，建議我通波仔，大家都知啦，不再多說。 尋日（15）號，早上十點半由兩個女陪同進入手術室，雖然兒子已講晒所有程序與感覺給我知，但我都很緊張！等醫生來時，我叫自己不要緊張，放鬆，於是集中精神練歌，諗下如何唱柳亭既煞板！ 等左幾個字醫生來，先在手落麻醉藥，跟著在動脈開刀，割脈呀！我的血管很怕羞，躲在脂肪深層不肯出來！在病房時勞動四位護士請佢才現身！搞左很耐才成功割脈！放導管進去再作詳細檢查，清楚地知道支架應放在何處！ 醫生一見影片，大件事，很窄，很高難度！他說有可能做唔到！點算？心中立即盤算，如要開刀搭橋的話，開嗎？中藥可以嗎？醫生叫我不要擔心，不要諗太多，安心休息。跟著聽見佢同另一個醫生商量如何做，（兩個醫生一齊做）試左很多次，用左很多方法都唔成功，我更驚，問是否做唔到？醫生叫我不要擔心，俾時間佢，佢還未放棄！ 搞左很耐，佢終於很開心地話搞惦，我問做完？佢話還未開始！只是有好既開始，是好事！事後才知，原來我條血管好似頭髮咁幼！而我塊鈣就很大，塞晒條血管，無路可通！鐵絲只能在血管邊擦過，不能在中間過，所以令血管有些微撕裂！好在醫生有經驗同技術，佢不肯放棄，用盡方法繞路而行，上上落落，‧繞一個圈，最終到達心臟！ 我問是否搞惦？他說而家開始放支架，叫我不要講野，佢要集中精神，重話食粥食飯睇而家啦！全部靜晒！只有佢叫助手做野張聲音，十足電視劇一樣！搞左一輪，搞惦，見佢有番笑容，（佢未開始時有同我地講笑）我又問是否做完？佢話未，要安兩國支架，重話唔好講野，而家呢個支架係救你命架！ 最後做完啦，佢鬆一口氣，話腳軟，重話是五級難度，即是頂級！佢都擔心做唔到！因為塊鈣令顯影過唔到，令佢睇唔到究竟有幾窄！女兒話睇片都見到有一段唔清晰！醫生話血管塞左百份之九十九呀！即是話隨時可猝死！真的好險！ 而家條血管很靚，醫生話佢一定幫我整到條血管最靚！因為條血管難度高，時間耐左，用藥多左，至於另一條唔搞啦，再落藥我會危險！因為果條不算嚴重，暫時無生命危險。只是有一個位比較窄，本想在該處放一個支架，等我舒服些。不過而家唔搞啦！我問，心臟有三條血管，咁另一條如何？他說果條唔駛理，因為天生很幼，真是一條線咁幼！所以唔駛理。我咪只有兩條血管可用！再問有無多一條？因為細佬多一條，佢話無！終於明白我點解容易受驚嚇啦，因為我心血少呀！ 當聽見醫生話過唔到時，我心諗是否我太緊張令血管收窄，於是放鬆成個人，跟著聽見醫生搞惦，我問醫生是否因為我放鬆左？醫生笑住答我，係呀，你繼續用你既方法啦！ 未做時與醫生護士傾偈，我的招牌笑聲無處不在，醫生話你很樂觀，很開心喎，笑到哈哈聲，我話我很緊張就真！（我一向用歌聲與笑聲減壓） 今次真的很好彩，執番條命！很多謝梁偉宣醫生不放棄，很用心地同我做手術，真的很多謝他！我擔心時，護士叫我放心，佢話梁醫生很好，佢得架！阿仔問我是否有重生既感覺？我話如不發覺，可能一年半載就無得開個唱！ 今次很感恩！以後又可以繼續開個唱！阿仔都支持我唱歌啦！佢地很緊張，我很開心！人生至此，只求可以唱好的歌，別無所求了！

健康

由於兒子上星期通波仔，佢毫無症狀之下都塞左

九成，我有症狀架，兒子催我去撿查，醫生話我

中招機會很高，約左明日入院檢查，希望無健康

事就好！

好險

兒子尋日出院，本來我話去佢屋企探佢，但佢叫我不要頻樸，今日約埋一齊飲茶啦，佢出來見我地。今日全部人出晒來飲茶，本來我話請，兒子話佢請。

兒子俾佢心導管張片我地睇，嘩！好險呀！原來條血管塞左九成！接近斷的邊緣！醫生話分分鐘死左都唔知咩事！

今日兒子叫我撿查心臟，不要拖延，好小事，唔痛架！媳婦話撿查左無事大家都安心，唔駛食乜丸物丸，有事既做左一勞永逸，幾個人一人一講，我投降啦，好啦，我撿查下啦，我相信我無事既！但我有徵狀架，屬高危一族！

今日問兒子點解會去撿查心臟？佢無三高，只是肥，年年驗身都很健康。無心口痛，無唔舒服，只是上樓梯有少少氣喘，很正常姐，媳婦迫佢去撿查，反正有保險！睇普通科醫生，兒子撒謊話心口很翳，醫生覺得佢無野，起初唔肯寫介紹信睇尊科，兒子扮野話很辛苦，醫生才寫信給他。尊科醫生先做跑步機，覺得有異樣，做顯影，話有三條血管塞左，立即叫佢覆診，兒子話很忙，請唔到假唔想去，媳婦幫佢約晒時間迫佢去，醫生話要通波仔，約左第二日入院，先做心導管，原來只是一條血管塞，但塞左九成，因為塞既範圍大，要放兩個支架！

醫生話好彩還可以通波仔，再唔搞就無得搞，只可活多兩年就會出事！兒子話真好彩，執番條命！所以今日猛叫我去撿查，因為佢病徵唔明顯，誰知咁大件事！今日將佢支俐底噴霧俾我看門口。

我同兒子講，很多野真是命運安排，命運推你去睇醫生，因為兒子同我一樣，病到想死才睇醫生，今次雖然媳婦安排好，但佢肯去睇，我覺得是冥冥中有股力量推佢去做呢樣野，兒子話有重生既感覺！

飲完茶回家開賭，我又做大贏家啦！真開心！哈哈，哈哈，喎哈哈

復出

尋日復出，北上操歌。誰知烏龍百出。早上準備好見時間尚早，於

是上網，半小時後出門口，我都醒目，攞定把遮。見天氣涼涼地，

換條厚少少既褲，唔想泠親，執齊所有野，最重要是八達通同身

份証！

落到街嘩一聲，很大雨！行去小巴站等車，攞定八達通出來，誰

知只見一張卡片，明明是八達通，點解是卡片？於是揾呀揾，結

果揾唔到，但遮就吹爛左，身也濕晒！（今日在手袋揾到啦！尋

日唔知咩事揾唔到！）

上到深圳茶樓，身上衣褲還是很濕！同學話，佢見天黑，一於早

些出門口，上左地鐵避左大雨，我無咁細心！只睇時間無睇天

色！另外兩個同學校都一齊話，知道會落雨，所以穿薄褲，濕左

都快乾！另一個同學話驚濕身，帶定條褲梨換！我竟然諗唔到，

精靈鼠病到矇左！

尋日很開心，唱左五首歌。今次有四個人生日，循例揾東哥幫我

地訂蛋糕。唱完歌去金運來食飯，叫埋明哥同東哥，剛好十二

人，食完飯返港回家聽歌。