酒逢知已

尋日破天荒第一次與阿媽打麻雀！事緣初五阿媽約我與網友阿麗一齊去大尾篤，阿麗提議搵日開檯大戰，我坐言起行，立即搵朋友幫腳，當然在我家最好啦！朋友稱我家是鐵竇，無人騷擾！

唱歌就阿媽叻，打麻雀就、、、嘻嘻，（秘密）我今年本來很旺既，場場勝利，尋日都旗開得勝！四圈執位，執到阿媽個位，本來都無事！誰知一時大意失膠片，（我地打籌碼）做左超級砲手！再起圈，又做射手！點解咁大方？因為阿媽囉！佢話我在早一晚做左手腳，旺過間屋，所以大殺三方，為表清白，唯有派膠片！最後結果皆大歡喜，我朋友唔駛做義工，有糧出之餘重有花紅！

賽後檢討，阿媽同阿麗都不是高手，唱歌我是牛奶咀，打牌佢地是牛奶手！我呢隻精靈老鼠獨力難支！朋友打左幾十年，麻雀發燒友，我地三個係業餘打手，賽果合理！我輸得最少，阿媽第二，阿麗最好人！

打完牌食飯，阿麗買左兩枝紅酒，朋友因身體關系不能食太多，淺嘗後回家洗碗。我地三個大豪客酒逢知已，我好耐無飲酒，尋晚捨命陪君子！高血壓不宜飲酒架！酒後無拘束！天南地北大話西遊！猶幸無亂性！阿媽無端多左個仔，我平白無端添個弟（女，不是郎）！

尋晚很開心！酒逢知已千杯少，可惜酒樓要關門，我地意猶未盡架！不別不別還須別，分手在子時！祈望下次再浮一大白，對酒當歌，人生幾何！下次在家飲，飲完狂歌！