團年與生日飯

團年與生日 2014/1/27 0:58:52 網誌分類: 家庭樂

我的生日在年尾，阿媽話我趕住出來竇利是，出來兩日就一歲！所以我每年都在生日果天團年，一次過。自仔女結婚後，為左就佢地返工，會揀星期六、日食團年飯，提早做生日。年輕時唔注重生日，老左就想慶祝生日。今年星期日是我新曆生日，所以揀左今日團年。特別聲明要有蛋糕！ 今日一早與大女同姐姐去買（食送），大女尋晚在四女家過夜。呢幾年懶煮野，由得女兒煮西餐，我買燒肉，雞拜神，中西合壁！舊年細嬸炆羊腩。今年由我主理，好耐無煮傳統團年菜，今年煮例牌菜，我負責買，姐姐負責洗，最後埋鑊是接班人，我家新任廚神——四女！ 今年的菜牌如下：雞，燒肉，魚，（今日買既芝麻班，160大元 ）煎蝦碌，西芹、三色椒、帶子炒腰果，冬菇、海參，螺片炆鴨掌，吉列豬扒，安記飽魚，粟米、紅蘿蔔、栗子煲西施骨湯。捌（食送）一湯。白飯無得裝！點解？六杯米竟然唔夠食！要立刻再煮飯！ 中G畫的生日卡！ 大G的千羽鶴！ 大女整既缽仔糕！ 媳婦送既生日蛋糕！

生日唱局

醇只 我班粵曲班同學很少操曲，佢地有人生日果個月就搵一日唔上堂，北上開生日會操曲當交功課。我去左返學後就改變左少少，去多左深圳操曲。今個月是我生日，所以尋日去左明輝，很開心，全部同學都參加，老師的朋友都梨一齊玩。尋日雖然只唱得三首歌，但玩得很開心，東哥一向很識做，我地切蛋糕時，佢放中西生日歌，又幫我地影相，搞到的氣氛很好，很開心，唱完歌去食飯，我叫埋東哥同東嫂，明哥一齊食飯，剛好十三人一圍檯。老師有位朋友上來同我們唱歌，佢是前輩，二十幾年歌齡！佢有事不能與我們食飯，知道我生日，放低三百元給我們加菜。食完飯回家已是十二點，很倦，尋日九點上去飲茶呀！ 尋日開心的原因除同學同我慶祝生日外，另一個原因就是老師，同學與音樂師父都話我進步左，算是俾番少少信心我，不過我明年諗住減產，學阿媽話，貴精不貴多，尊心唱好的歌。老師話前輩雖然唱左二十年，每星期操歌，但只識四十首歌，佢好尊一地唱好每一首歌！我只問不如，我喜歡的歌太多啦，每首都想唱，每次都很享受唱歌的樂趣！ 今日睇驗身報告，很安心，報告很靚，醫生好似覺得很奇！佢見我血壓高，人又肥，可能覺得我會有問題，所以叫我驗血！今日佢話報告很好喎，語氣有少少出奇！血糖很好，肝同腎功能很好，血報告很靚，無貧血，血脂同膽固 是高左0.2，比半年前低左呀！壞既膽固醇都唔高，佢話可以接受，繼續戒口。查實我無戒口架，只是身體機能自動收制，我食少左野。 報告雖然靚，但我未能完全安心，因為近日血壓又創高峯，而家食田七，睇下是否有效。

緣

學玩電腦不經不覺已有三年，在網上認識一班網

友，雖然隻虎宣布榮休，我地幾個A貨年輕人相

約在頭條再見，我也在這裡寫網誌。

前年有網友由加拿大回來，相約香港網友出來飲

茶相聚，那次是等一次見面。舊年另一個網友也

是由加拿大回港探親，我地又出來食飯相見，果

次是第二次聚會。舊年聖誕有網友提議搞飯局，

聖誕是第三次聚會。

每次聚會大家都很開心，有講不完的話題，一餐

飯食四個鐘，盡興才分手。

有網友提議每年聚會一次，但有網友話一年一次

太少，起碼都兩次啦！我都覺得係，一年搞兩次

聚會最適當。

大家在網絡相逢到相識，緣份不淺，應好好珍惜

呢份緣！

2014

今日是2014年既第二日，上午與幾十年老友飲茶，佢聖誕前娶心抱， 今日一坐低就話很唔開心！我即刻唔寫點心問佢何事？原來佢個仔結 完婚兩日在的士俾私家車撞，玻璃割傷鼻樑要縫針，好彩無大礙，佢 擔心破相，我話算啦，好彩唔係彈到眼！跟著佢話近排成日情緒低 落，唔想做人，覺得很辛苦！我叫佢同醫生講，安排心理輔導，（佢 係公務員家屬，唔駛錢），我擔心佢有老年抑屈病。我清楚佢的家 事，也認識佢的家人，我14歲識佢，相交半世紀！ 飲完茶出佐敦做飛蘇，剛做完老師來電，話佢朋友買左兩張演唱會 飛，臨時有事，問我去唔去，反正出左街，搵到同學陪我一齊去文化 中心聽歌，今晚無晒我時間，歐凱明既殺忠妻一流！唱得很好！兆明 唱雙平，高山流水會知音，錯左三度！何華棧唱南唐，都係果句，我 唔識欣賞佢。 聽完歌很開心，遇到朋友一齊坐巴士回家，呢幾日真係好，去邊都是 二大元！一回到家就見到獲士，之前關左數據。 呢次到我唔開心呀！網友舊年約左二月尾去明輝，佢今日話要陪兒子 去澳洲，所以不能去明輝。跟著再睇加拿大網友個群組，卜左唱局間 曲社光榮結業！2014唔係一世呀！係十四呀！所以今年萬事都要小心 才是！好彩未過農曆年！明年馬到功成！希望我的歌藝到馬年就歌 成！

1314

尋晚二女與朋友都傳來信息，話尋晚與誰人一起就會與果個人一生一世！

我少女時鍾情於愛情小說，中毒很深！以為愛情重於一切！也深信一生一世！

過左幾十年人生，突然在夢中驚醒，原來小說騙人架！俾人話我太單

純！太執着！無野係一生一世架！

但我相信有！我在獲士中對女兒講，我與你們是1314，離不開架，你

地擺脫唔到我架！

我尋晚與誰人一齊？勁啦！幾個大佬倌陪我唱歌倒數，直到睇埋煙花！重用歌聲氹我睡覺呀！

我與誰1314？歌囉，我幾歲大已經唱搜書院，聽紅綫女！少女時喜歡

新馬，任姐，結婚後喜歡陳笑風與聲哥。人生最窮時唱任白歌減壓，

一生與粵曲結下不解緣！退休後更迷戀它！尋晚就是歌聲與我一起！

由13到14！新年願望？咪就係希望可以一生一世都可以唱歌，有錢唱

歌！有人同我唱歌！

前幾日有親人做手術，前列線癌，初起，又是驗身時驗到，手術費四

十萬有多！私家醫院，澳門証來香港做，佢擔心將來無錢養老，本唔

想做。我對佢講，我地幾十歲點會有將來？（佢大過我），有錢執都

無氣力啦！而家求既係健康與快樂！孖生兄弟梨架！有健康才能快

樂，快樂才會健康！幾十歲唔需要諗將來，只有目前，珍惜每一日，

開心過每一日！無錢時同政府攞啦！澳門每年有幾萬架，香港咪申請

綜援囉！老人食得幾多，着得幾多呀！我唔諗架，總之開心過每一

天！天跌落梨才算！

我最開心就是唱歌！埋到咪連病都無！咳到死但唱歌時唔咳架！唱完

就勁咳！老師話我埋到咪就成個人都唔同晒，特別精神！我真係好享

受唱歌！雖然無天份又無先天條件，總之我享受過程，唔理成績！

新年願望是唱歌、唱歌，再唱歌！繼續開心快活！

新年快樂

祝大家新年快樂，身體健康！