生日快樂

今日大G生日，佢一早安排去M記早餐，跟著去踩單車，午餐則是白熊 咖哩，晚餐在姨媽家開生日會。佢點菜，要有羊架同灼蝦。我問她想 婆婆送咩？佢諗左一陣話送蛋糕啦，當然佢自己揀左，女兒去訂，我 俾錢。我今日唔跟佢地踩單車啦，大女與姐姐過來幫手預備晚餐，我 留守大本營，幫手買材料，細女尋日在吉之島都買左很多野！細女很 緊張孖寶的生日，希望佢老左後都得到同樣待遇啦！希望孖寶長大後 識得回報啦！

回顧

2013年還有幾日就過，好快就到2014年，時間真的過得很快，我學人回顧一下！2013我算是開心的一年，雖然有幾次事件令我們很擔心，但都好彩最終無事。高生也曾想與我做朋友，但總算拒絕左佢！肩周炎呢個朋友都去左雲游四海，今年病左幾次，每次都咳得很嚴重，曾經試過封聲！好彩無影響我搵明哥！希望來年平平安安，無風無浪！今年有幾件很開心的事，中秋時有網友由加拿大回港，我地搞左一次網友聚會，認識幾個未見過面的網友，果次聚會很開心！而家日日在網上交談，重稱為A貨年輕人，呢個名真係改得好，很貼題！11月網上曲友也是由加拿大回來，她們是一年一度燕歸來，我地又來一次中，美，加，香港網友粵曲交流，大家唱得開心，食得開心！一月再有一次粵曲交流。至於香港網友都唔弱，今年已經操左兩局，並約定二月再唱歌。所以今年唱得很開心！今年阿媽與我月月操歌，操完歌又指出錯的地方話我知，所以老師話我進步左，當然老師很有心機教我。希望明年可以達到目的，去到我的要求！
今年搞左兩次家族旅行，一次去泰國，一次去澳門，孫兒們玩得很開心，當然我更開心！全家人一起去旅行真的很開心架！希望每年都可以全家去旅行！
今年最開心的事當然是細女可完成碩士課程！佢請我睇寶珠呀！諗起就快可以睇寶珠演粵劇，又是一件開心事！
2013年是開心的一年，希望2014年繼續開心，繼續唱歌！

聖誕快樂

尋日開派對，小朋友在差今年誰人的爸爸做聖誕老人，媳婦好提議，叫我扮，等小朋友估唔

到！誰知佢地很聰明！大G話認得我面上的粒粒，（雀班）中G話認得我講既英文聖誕快樂！

（發音唔準）男仔話點解唔見左我？今年由四女擔大旗，買同整都是佢，我真正退休了！我

家大廚私房菜，四女出品，必屬佳品，味道一流，色香味俱全，只此一家，並無分店！

祝大家日日都是平安日，，聖誕快樂，日日快樂，身體健康！

舊相

網友想我分享人生經歷，我的一生很平淡，快樂童年，不知愁是何 物！人到中年萬事哀，開始遇到重重關卡，年青人氣力不凢，遇強越 強，無有怕！到左晚年就坐享其成，唱歌去也！當然中間有漣綺，輕 舟已過！如此平凢的人生不說也罷！睇相算啦！ 今日本來想搜集証據，二女話我無同佢去過城門水塘。誰知証據就搵 唔到，搵到我的美麗回憶！好野當然要公諸同好，大家分享！ 我的人生！ 我的前半生！真係靚女梨架！嘻嘻！ 三十後的歲月！依然美麗！呵呵！ 很珍貴的舊相！第一次去海洋公園，是老爺出錢請我地去，當時很 窮，何來錢同仔女去海洋公園？京士柏公園就每個月都去！果度是我 家的集體回憶之一！也是最快樂的時光！窮風流，餓快活！ 第一次去淺水灣是與奶奶一齊去，兒子第一次落水，驚到叫救命，中 學時考左救生員牌。二女人細膽大，幾乎唔見左佢，自己行左去水中 央，嚇到我幾乎心臟病發！往事歷歷在目，只好講句時光飛逝！

第一次

今晚老師出騷，唱去國歸降，叫晒我地全部學生做佈景板，我本來是堅持唔出騷既，但今次推無可推，在半推半就，威逼無利誘之下失守防線！今晚做開口梅香，有身份同口白架！（做張義），老師叫我揀一個角色做，當然揀一個最少野講既做啦！ 今日中午飲茶，飲完茶與同學行一陣商場，跟著去後台化妝，有兩個同學義務幫我地化妝，不過我地很識做，係咁意封番一封利是給佢兩位，誰知佢又俾利是我，話我首次登台喎，老師都有俾利是我地，哈哈，未到新年就玩交換利是！ 今日真係好開心，一班人一齊在化妝間有講有笑，有我呢個大笑姑婆在，一定笑聲不絕架！老師個家姐話，聽見我講既野笑到眼淚流喎！做人開心的好，可以減輕緊張既情緒。好奇怪同好意外，我竟然很淡定，一字不漏地講晒的口白，成績唔錯，老師很滿意我們的表現！ 演出完拉隊出佐敦宵夜，我們在葵青演出。我既第一次就咁無左啦！同學又話等緊我同佢出騷啦！ 我今晚的造型，我覺得很怪！我有十年無化妝啦！

舊地重遊

舊地重遊 2013/12/9 0:2:41 網誌分類: 家庭樂

荃灣城門水塘相信很多人都去過！我第一去是四十年前，初來香港，細女未出世，大女與二女跟姑姐返澳門渡假，我同老公帶同兒子與四女行水塘，兒子三歲，四女唔夠兩歲，我穿三寸高跟鞋！（當年時興）行左五小時，繞水塘一圈，可想而知果次印象有幾深！ 對上一次去水塘則是三十幾年前，與仔女，甥女們一齊去，今次醒，只行一段路，行到有水玩既地方停留玩水，結果個個濕晒身，除左衫用樹枝晾乾，仔女們今日都印象猶新，津津樂道，回味無窮！ 講左咁耐，相信唔駛再講都知我今日去邊啦！之唔係城門水塘囉！ 大女話呢度是香港大峽谷！ 嘩，多左很多馬騮呀！好大隻！居然識搶野食！勁！ 在水塘玩到五點就離開，在荃灣沙嗲王食飯，飯後各自歸家！ 回到家很倦，唔想郁，忙左兩日，尋日上午同孫兒飲茶，下午整理歌書，準備今個月同下個月既網友局，又要準備下月與阿媽果局。跟著趕去沙大睇兆明演白龍關，尋日既驚喜是梁煒康扮女人唱子喉，引得笑聲不絕！

交換禮物

今日是大B的生日，呢個仔每年同佢搞生日會都病，所以呢兩年唔搞生日會，只在家食蛋糕就算。佢早幾日對女兒講，生日叫埋婆婆一齊食飯，佢親自打電話給我，話邀請我去他家中食飯。所以我今日帶埋阿積兩兄弟參加佢既飯局，佢親自點菜，細女親自下廚，分兩日去超市買野！而家的小朋友真幸福！

佢早幾日已經在玩具反紏城揀左一件玩具做生日禮物，婆婆今日再送利是一封。女兒則請我睇寶珠作為生日禮物，一於兩母女玩交換禮物遊戲！

開心日

:活

今日很開心！原因有三！ 第一，尋日個唱很順利，的咳很合作，無騷擾我唱歌，把聲都算聽話，唱得不算辛苦。尋晚聽晒所有歌才睡，今日一早醒左又聽，終於有一首歌是自己覺得滿意，很有滿足感。今日去阿媽處，佢都讚我呀！ 原因二，前日老師讚我進步很多，尋日上到明輝，東哥與簫王在問口同我講，讚我用氣好左，走音少左。所以很開心，終於有進步啦！ 原因三，呢個才是真正開心的原因，朋友今日一早幫我排隊買飛，買到啦，寶珠演再世呀！朋友要星期六才方便睇戲，所以買18號星期六，二樓才有，無所謂啦，有得睇就得啦，朋友破天荒買咁貴既飛，680元，無老人優惠呀！為左寶珠無所謂啦！

美女

今日整番隻牙啦！朋友的愛人很細心地幫我補好隻牙，整得很

靚，佢唔肯收錢，不可，材料都要錢買架，後來只象徵式收材料

費150元，唔得，我俾左二百元，加埋一餐茶，與朋友吹水三小

時，成日消費只是370元，如果睇牙醫當然唔只此數，駛錢都唔

必整得好，朋友真的很用心機幫我整靚隻牙架！我唔駛做崩牙

婆，變番做A貨美少女啦！哈哈，哈哈，喎哈哈！明天靚靚心情開個唱！

終於見到寶珠張海報啦！靚唔靚則見人見志，我當然覺得靚啦，因為佢是寶珠！

末路悲歌

堪嘆末路唱悲歌憤火自暗燒！這句歌詞應該很多人識。

今日我同大家講一個真實故事，一個末路唱悲歌的故事。

係很久以前，（應該有30年）有一個女人，（稱她為A啦）本來有一個很好的家庭，有幾個女兒，無兒子。誰知男人有第三者，不顧妻女而去。A養大女兒，也各有家庭。A本來責任已完，獨自找尋自己的興趣，她有份工，經濟唔駛靠女兒，她喜歡跳舞與打牌，是我朋友的同事，也是我的麻雀腳，我地打的是很衛生的麻雀。日子過得算開心！她住的是政府屋村。

有一日，女兒與女婿對她講，（唔知第幾女，當時與她一起住）佢地想買居屋，叫她用綠表申請，反正她們會照顧佢，重話佢都是與她們一齊住架啦！A心諗，又係既，反正一個人都是跟女兒架啦，於是行錯第一步，（A自己講）用綠表申請居屋，攞晒積蓄給女兒作買樓首期。（行錯第二步）幫女兒無錯既，當時這樣諗。

誰知買樓後，女婿態度有變，住得很唔開心。放假就去跳舞，有時約我地打牌，盡量唔留在家，免生磨擦。誰知公司裁員，她被迫退休，當年50幾歲。在家時間多左，磨擦少不免，住唔落去。另一個女叫她搬去佢處，因為女婿生意失敗，佢要出去做野，想A幫佢照顧仔女，A當年對我地講呢個女很孝順，對A很好，於是搬去幫手睇孫。見女婿生意失敗欠人錢，又將部份退休金給女婿還債。

本來生活都算幾好，有時間就去跳舞，約我地打麻雀。

A不幸的是腳有問題，8年內做了4次手術。今年隻腳較的金屬夠期，痛到死，醫生話要再做手術，但手術後都不能正常行路，要用四方架扶住，不能行太遠。

久病床前無孝子，長期要人照顧日常事，會令人煩厭，A開始有抑屈病，佢覺得自己無用，成為別人的包袱。最主要女兒與女婿感情有問題，經常嘈吵，女兒又唔同佢講野，當佢是精神病人，佢成日話想死，唔想再捱，每次手術都很辛苦，很痛！而且呢次手術後都不可去街，困在屋裡很悶，又令人厭，想跳樓但不能爬上窗。

佢曾經搵區議員幫手，如何可取綜援，如何可申請房屋？佢既問題是，居屋有佢名，不能申請獨立老人屋，要將個名轉晒給女兒，補幾十萬！佢無錢。佢與女兒一起住，不能申請綜援，只可每月拿政府的2200元，議員提議佢搬開住，兩年後申請老人屋，問題是而家的租咁貴，點租？獨居後所有生活費都要自己負責。

A現在坐困愁城，佢形容自己是求生不得，連求死都不能！以淚洗面。我聽完朋友轉述A的近况，個心都很唔舒服，替她難過，以前與她打麻雀時也曾聽她訴苦，記得她當年苦口婆心的勸我一定要保住間屋，一定要有屋住，要獨居，不可與仔女住。現在睇她與親家的境况深有感受！

仔女多不一定有人照顧，呢個問題，細女很早已經對我講，佢在醫院見得太多可憐長者。人老左最重要是錢同健康！興趣要錢架！工聯會與長者中心都要交學費架！無健康自然令人厭，同學長期照顧老人癡呆既母親，搞到有抑鬱病，最終送去老人院，同學才可減壓！

都係果句，得快樂時且快樂，今朝有酒今朝醉，莫待他年歌不成！