靚模

很忙，咳到死都不能休息，尋日一早（AM0630）出機場接別人老公的機！點解？他是女婿的哥哥，回港慰妻，女兒託佢帶左兩喼野回來，女兒幫我地在美國買羽絨，因為比香港平，有健康產品等。無人有時間去機場，機動部隊出發。 朋友也有兩張羽絨被給她家姐，她與我住得很近，助人為快樂之本，順便做埋物流，朋友很開心，千多謝，萬多謝，請我飲茶，又送我兩張糕券。都話助人是快樂架啦！ 飲完茶回家煲藥，飲完藥小休一陣，披甲上陣，去高山捧老師場，食埋宵夜回家已是深夜！ 今日一早搵人執藥幫我煲埋，（中醫要下午才有得睇）約朋友飲茶等藥，飲完藥回家等電話，細女約我去中大還袍，取證書，順便影中大個標記，上次搭棚行畢業禮，所以影唔到。 今日既任務係做模特兒。細女用腳架影，我幫佢試位，當然我都有份影，兩母女影得很開心！ 影完相去沙田行（雪啪媽屐）細女買春雞，記得阿媽話黃雞好，叫女兒買黃雞，佢買左很多野，我買火腿與靚牛肉，羅馬生菜，見有蝴蝶餅買左兩種，今次唔算多錢，好忍手，只用左260元。腳痛又拎野，女兒給我100元坐的士當人工。 回家後睡覺，本來去香港大會堂聽緣的約會演唱會，實在太倦，唔去啦，張飛給曲友的老公，等她們兩公婆拍拖聽歌。

殺敗了

殺敗了，殺敗了！（中洲話，內場）

尋日帶咳上陣，一王三后，（幾好艷福）本來要唱十首，同學見我得半條人命，佢同東哥唱多首減輕我負擔。結果我唱九首。頭幾首無事，沾沾自喜，有功力呀，咳到死都唱到，蕭王讚我無走音，重唔身輕似燕，幾乎飛上九重天！

都話小朋友小氣架！跟著唱胡茄就走音啦！唱雲娘出唔到一紙書！（輸晒）第六首開始聲帶疲勞，上唔到高音，痰就上左很多，阻塞通道，要用晒所有食飯既力才出到聲！（因為我唔飲奶，只食飯）不過，音樂師父話我叻，咳到死都可以直落九首歌！我都覺得自己有少少功力！

點解病都要唱？原因有三！第一約左曲社成個月，臨時唔去，人家無左一日生意，唔係幾好，所以我盡量都唔想推。

第二，約晒曲友，溫晒歌，臨時唔去很掃興，得我一個平喉，牽一髮動全身。（我很重要架）

理由第三，亦是最主要既理由，我鍾意唱！唱歌能醫百病！

夢

2013/11/25 19:23:47 網誌分類: 生活

今日同大家講古仔，與夢有關！我很少發夢，就算發夢都唔記得！但 今次很奇怪，發完夢記得很清楚！ 星期四晚發夢，在夢中行街市買魚，見到很大條獅頭魚，立即買晒， 我的至愛，只是幾條。買完獅頭魚想去買黃花魚，阿積鍾意食。 怪事發生啦！記得細時澳門無殯儀館，全部在家中搞惦！我離遠見到 很驚，一定運路行。在夢中就是見到兩間屋辦呢的事，運路行，每個 街口都有人抬住呢的材，攔住我去路，四邊將我圍在中間！好辛苦才 衝出包圍，唔知點又去返街市，見到有很大條冷藏黃花魚，很開心買 梨煮蘿蔔，以前經常食。夢醒。 星期五早上與朋友飲茶，講起個夢，都重係好驚！朋友問直定橫？我 話咩都有，打橫打直都有！朋友話直是正財，橫是橫財！財咩？無收 入，又唔買六合彩，何來有財？ 星期六晚飯後發覺門牙好似有野，又取唔到出來，去照鏡，明白晒！ 打電話給老友，我話終於明白個夢講咩！我在夢中被包圍，我是衝出 來，即是破材而出囉！明嗎？唔明？不要心急，且看我慢慢寫來！ 話說十年前，我在家中拖地！（十年唔逢一閨，出事囉）一個唔小心 跌倒，崩左兩隻門牙！係打橫斷左！牙醫幫我駁回。十年後假牙部份 甩左，做回崩牙婆！睇清楚，千祈唔好誤會是某人呀！ 我咁年輕貌美，無理由唔整番靚隻牙架！牙醫很貴架！明未？破材破 財呀！原來夢是先兆！好彩尋日唱歌無漏風咋！

無常

幾個月前約左曲友北上唱歌，一直很期待，終於日期快到啦！約左明 天去明輝！尋日一早醒來立刻獲士，商量明天如何會合，去何處飲 茶，很開心！當時是早上唔到十點。 十點三十分老友來電約飲茶，因為佢下月娶新抱，約我出來派帖。十 一點多在美心飲茶，正談得高興之時，曲友來電說明天不能北上！為 何？很不幸，她有家人突然走左！雖然我唔認識她的家人，但聽到消 息都很不開心！唔算老人家呀！在電話中不知說什麼好！只有無言的 關心與問候，呢個時候所有安慰的話都用不上！只有一聲保重！ 人生真的很無常！估計不到！好開心地商量唱歌的事，一小時後晴天 霹靂！ 好開心地祝賀老友心願得償，她呢杯新抱茶期待已久！話未說完就聽 到另一個友人的悲痛事！當時心情很難形容！ 另一個曲友來電問明天如何？我地三人一局。她很難抽出時間北上， 我唔想取消，但兩個人如何唱五小時？我是狂龍，她不是顛鳳，立刻 打出求救電話！時間咁急加上星期天，當然班唔到救兵啦！我同曲友 講，唔驚，照上！我地輪流唱單支，我同東唱雙平，跟著通知東哥， 若有人要夜局就俾人開六點啦！我地隨時可變陣。 尋晚即學一段情，希望明天可以唱。一於又打天才波，兵行險着是我 強項！因為我是老鼠！

風雲

呢幾日立網很熱鬧，兩班戲迷起風雲！

講真，真正是寶珠同笙姐既戲迷都應該是人生經歷豐富的人！

年紀唔算輕，何必再要爭吵！

我不是專一的戲迷，喜歡任姐，迷戀寶珠，但也是龍迷！

當年睇電影一定睇寶珠，睇粵劇一定是雛鳳與聲哥！

藝術是不能比的，寶珠好不等於笙姐不好！任姐唱歌好聽不等

於聲哥唔好聽！各人喜好唔同，標淮不同！各自捧自己的偶像

算，無必要踩低別人！

當年珠迷與芳迷之爭，校長與哥哥的歌迷之爭，估不到幾十年

後風雲再起！

我很背，唔知寶珠幾時起班？幾時開始賣飛？只知道是明年會

與嗲姑演再世紅梅記。如有網友知道，請告訴我知！

中大一天遊

尋日全家出動去中文大學與細女影相！由細女充當導遊，選左三個景點做背景。兩個家姐加兩個姐夫與哥哥組成五人外勤攝影隊，鑽石陣容！三部相機加幾部咩風電話。

早上10;30分沙田鳳城酒家集合，兩張大檯，齊齊飲早茶。大女幾日前上網訂檯。

中年12.30分到達中大，坐校車上山，成班小朋友上車後，幾個年輕人齊齊起身讓坐給我們幾婆孫。尋日很多人。天氣很好，有陽光唔算很晒，有風但唔涷。

小朋友最開心！好似去旅行一樣，大女形容是小朋友遊樂日！

尋日叔仔兩夫婦要去飲，但佢地很錫細女，一早梨飲茶，去到中大影左幾張相才去飲。

細女尋日有驚喜，叔嬸在阿嫲的遺物中揀選一條珠鍊，說是代阿爺阿嫲送給細女做畢業禮物。佢老豆送現金獎，津貼佢去泰國之用。阿媽有無獎勵？讀得咁辛苦當然要獎啦！我送左一隻鑽石戒指給她，做過紀念！（用澳門政府派既錢）

細女話好驚喜，好感動，好開心！為左多謝家人的支持，請我地在沙田帝都酒店食自助餐，所有訂檯、比按金，下載優惠，全由大女負責，佢一向辦事我放心，誰知尋日出意外！佢換手袋時忘記取優惠卷！每人慳成百元架！好彩沙田廣場有快圖美，立即去下載，點知無得上網，好彩大女夠醒目，唔知點話用手機影再影印，好複雜，講左我都唔明！總之搞惦。酒店哥哥很好人，我差兩個月才是長者，佢見我嬌聲滴滴又貌美如花，算埋我是長者。

肉類麻麻地，蝦幾好，蟹粥最靚，有壽司同生蠔，很多甜品，汽水任飲！

又是小朋友最開心，食左差不多四小時，大家才盡興地各自回家！

尋日真的很開心但很倦！

開心日

藉此機會衷心謝謝我的家人，謝謝媽媽的身體力行的支持，今天收到禮物實在好驚喜，謝謝父母和叔叔嬸嬸，謝謝老公這一年的包容和體諒，謝謝兄姊們的支持和力量，最後謝謝同事們的忍耐和提點，謝謝你們借書給我，讓我re duty 返學，謝謝您們各人，I love u all! 以上是細女寫在面書的文字。 我送給女兒的畢業禮物。 女兒送給我的禮物！ 好開心的一天！

發啦

發啦！兩星期前在兒子的屋苑播種種菜同辣椒，兒子今日去睇，

生菜已發芽啦！辣椒開花啦！

二女在家試整綠茶紅豆飽，佢話今次的粉發得很靚，的飽都很好食！

立網又起風雲，兩班影迷又交鋒！為什麼？聽聞寶珠與阿嗲起班演再世紅梅記！有人話海報用舊相。不知有無人睇過海報？消息是否屬實？如寶珠真的起班，就真係發囉！要儲錢撲飛呀！

細女的成績

細女今年碩士畢業，佢篇論文分別入選國際同香港的醫學組織舉辦的比賽，（差不多，我不大清楚）今個月尾去泰國參加國際會議，好可惜就是與畢業禮撞期，不能參加畢業禮。香港入選的文章今，明兩天在醫管局有攤位展出，細女很開心，辛苦努力左成年，終於有成果！

童言

孫兒大B今年升小一，初次默書，成績不算好。我問他為何咁低分？他說唔識囉，無溫習嗎？有，不過唔記得。跟著對我說，老師話低分唔駛唔開心架，只要盡力就可。我問他有盡力嗎？他說：有，我盡晒力架啦！

上星期考試，數學成績唔理想，我笑他，你咪話數學很簡單，難唔到你架？他竟然話：佢騙人架，加數變減數，減數變加數！

三峽之旅

四天三峽之旅竟帶病而歸，重感冒，中西合璧，聯手趕走病魔！未有精神寫病鼠游記！先請各位睇相先。