紀念日

尋日下午北上，晚上回家開獲士睇，原來尋日是兒子與媳婦結婚十週年紀念日！佢地去食西餐慶祝。

大女話也是她與老公第一次拍拖紀念日！

媳婦又話是她與四妹夫第一次通電話紀念日，我正感奇怪，媳婦點解會與四女婿通電話？因為四女婿當時還得到四女肯做佢女朋友，雖然他們認識左十幾年。

再睇獲士，四女話尋日原來是她重生九週年紀念日！九年前台灣大車禍，佢執番條命！死左幾個人同幾十人受傷！果次不幸令佢人生有很大轉變，得到一個好老公！緣份由天定，半點不由人，命運有安排！

我見他們講得咁高興，咁多野紀念，我不甘後人，也來湊熱鬧！我話也是賭神十週年紀念日！誰是賭神？是我也！大家都記憶起當年的一幕！

話說十年前，兒子結婚，佢份人很轉統，很執着，要跟足所有繁文褥節，所以很忙，但忙得很開心！兒子工作很忙，我要事事參與。

當年酒樓唔收卡，唔收支票，所以早一日在銀行買張本票，兒子因為忙，怕遺失，交給保管，我很小心地收藏。

結婚當日，大女幫我打點所有野！佢問我需要她保管本票嗎？我話唔駛啦！咁重要既野我自己保管得啦！

當日很順利，很開心，到結算時，搞惦晒，俾錢啦，我取出（支票），兒子望著我，經理面色都變，發生何事？兒子話呢張是一千元支票呀！阿媽！我要既係十萬元呀！嚇！一睇，我拿錯左，都是恆生票，都是一個1加幾個o，睇少兩個0，怎麼辦？兒子驚跌左張票，我很肯定地話一定在家中！但怎算帳呢？最後經理只好接受碌卡！總算解決件事！

第二日過澳門擺酒，大家當笑話般流傳開去，兒子話我當時好似賭神，在手袋取出支票放在桌上好有欵，以一千當十萬！真的好似做戲！

夜局

今晚本來是陪人去操曲，我無感覺想唱，誰知唱左五首。

老師同一個朋友梨唱，佢話同我唱紫鳳樓，又話對花田錯會很熟，唱左很多次。我下月有三局，與網友唱紫鳳樓，同阿媽唱花田錯會，今晚正好預唱一次。

花田是第一次去大陸操曲，跟同學去樟木頭唱，因為平，480元一局，人仔又見駛。果次好深印象！一開始楊洲二流，一大段音樂，唔識聽，當然唔識入啦！停鑼鼓再起，都係唔識入，頭架叫我望著佢，佢一點頭就開口！而家諗起都好笑！

宿命論，幾年後既今晚再唱，也是停左兩次鑼鼓，也是楊洲二流！曲社份譜同我睇開果份有少少唔同，多左一板，我跟唔到譜唱，出唔到個音！後來師父叫我唔好理份譜，減左一板，再唱才無事！子喉有私家譜，一對之下真的多左一板！

試新菜

今天是細女新曆生日，四女請飲茶，因為細女要買材料煮西餐慶祝生日，所以去荃灣廣場間新斗記飲茶。

飲完茶先去樓下一田買野，我忍唔到手，買左一包泰國白蝦，因為試食後覺得好食，買一包火腿骨，一包漢堡羊肉，四女買一包漢堡和牛。唔知四女買左的咩，我有四條紅衫魚游左出海！

細女買左佢要買既野，也是游左四條魚出海。

在一田買完過對面已改名既吉吉島買羊同牛排。我和四女見細女買得高興，忍唔住又加入購物團！

見有牛肋條，突然想學阿媽煮牛肋條。一包牛肋條65元，唔知幾重！（我而家唔只是無飯主婦，簡直是無知阿婆）阿媽話洋蔥湯，我大鄉里，無見過，搵左好耐，終於搵到啦，法式洋蔥湯，嘩，架上貼紙話42元一罐！諗左五分鐘，用雞湯可以嗎？最後忍痛買一罐！阿媽話19元，難道是我搞錯？四女連單都掟埋，無得跟查了！問四女枝紅酒幾錢？佢話好平，幾十元，唔記得喎。我地兩母女都是十點鐘出世！四女買一隻烏雞煲椰子，紅羅蔔，粟米湯，又買左三隻法國春雞，埋單俾錢，差不多一隻牛！

財散人安樂，各自歸家，在的士中，我同四女都話，細女生日又關我地事！點解買咁多野？用咁多錢！我地話下次唔陪細女買野！每次陪佢行呢兩間超市都大出血！

呢味牛肋條是我跟阿媽所寫既照講，四女出手，佢怕我雞生鴨腳呀！我口述，佢照做。佢煮好試味時話難食，好淡，佢落左鹽。到我過去試味時都是淡，（我唔知女兒落鹽）記得阿媽話可加生抽。但我同女兒都覺得欠一的野，呀，無糖，立即加冰糖再開火炆。好味！都話我是無知阿婆啦！

朋情

前幾日與朋友飲茶，朋友話佢老公整話梅豬手很好食，我很喜歡食豬手，以前每逢過年過節都一定有發財豬手，後來仔女大左，人人話怕肥，豬手無人食，所以我都無整很多年。聽見朋友話佢老公整得好食，我立即同朋友講，下次仁老公再整，到送一些給我食。誰知事隔兩日，佢老公真的整給我食，他煮得很好味！真的很多謝他！友情可貴！

名牌

10/10/2013 1:37:29 網誌分類: 生活

巡視業務，去到阿媽度，見到很多馬騮，好有親切感，因為我家最多！ 原來是阿媽用既袋，我唔識品牌，因為無錢用，也唔捨得買貴野！我對物質無要求。 最近有人既父親走左，剩有遺產，每人分左一筆唔算多也唔算少既現金。上月尾我去飲，見到A打牌，過去打招呼，唔覺意整跌人家個手袋落地，佢立刻話做咩整跌我個袋？買左四千幾蚊架！我話唔好意思，我未用過咁貴既袋，所以唔知你個袋原來咁貴架！講完走開。 上星期又去飲，同一班人，與B傾偈，講起A的態度，B話唔理A，四千幾好平常，佢用果個7千幾，c果個8千。（佢地是姊妹）去到酒樓，打牌，主人家換衫出來，（也是姊妹）c話D件衫租既，都要三千幾，因為是飛甩雞毛！我本來是講笑，我話有次與朋友行威記，（威利斯人）朋友話呢間是飛甩雞毛，我未講完，c立即加重語氣，飛甩雞毛喎！當我大鄉里，我牛脾氣又來，我話我知，飛甩雞毛呀嘛！我唔用架，通街都有！c增大對眼，再加重語氣，名牌梨架！我話，我知係名牌，不過都係唔會用，通街都有，嫌佢平，我只用飛甩鴨毛！ 回程當然是細嬸送我啦，講起呢班暴發戶，不值一笑！初學人用名牌，幾千元買十年前既舊款，以為很巴閉！細嬸話佢只用新款，無錢都唔用舊款，最多用無牌子既袋，我話我是大種乞兒，唔用A貨，也唔用名牌既月下貨，只用雜牌。 每個人的價值觀唔同，幾千元買個袋，我唔捨得，幾千元與仔女食海鮮我唔肉痛。 細嬸話呢班人窮得耐，而家有少少錢以為很了不起！一副暴發戶咀臉，錢真是萬能！可以令人出賣所有野！